Суд над Рыгорам Кастусёвым адбудзецца 23 сьнежня

Разгляд справы аб адміністрацыйным правапарушэньні, нібыта зьдзейсьненым Рыгорам Кастусёвым падчас адзначэньня Дня памяці паўстанцаў Кастуся Каліноўскага ў Сьвіслачы 26 кастрычніка 2014 года, адбудзецца ў судзе Шклоўскага раёна 23 сьнежня ў 11-30.

Пра гэта палітыку паведамілі сёньня з суда Шклоўскага раёна.

Намесьнік старшыні Партыі БНФ кажа, што ён будзе прысутнічаць на судовым пасяджэньні і пастараецца давесьці да суда тое, што ён ня лічыць сябе вінаватым у зьдзяйсьненьні надуманага супрацоўнікамі праваахоўных органаў адміністрацыйнага правапарушэньня.

У Сьвіслачы 26 кастрычніка 2014 года адбылося традыцыйнае ўшаваньне памяці паўстанцаў Кастуся Каліноўскага, удзел у якім прынялі грамадзкія актывісты з розных рэгіёнаў Беларусі. На мерапрыемстве прысутнічаў і Рыгор Кастусёў.

Увесь час ад могілак у Сьвіслачы да сканчэньня мэрапрыемства ў Якушоўцы прысутнічалі людзі ў цывільным, і міліцэйскі апэратар усё фіксаваў на камэру. Цэлы шэраг удзельнікаў адзначэньня Дня памяці ў Сьвіслачы ўжо пакараныя вялікімі штрафамі.

яс/spring96.org