А. Гайдукоў адпушчаны зь міліцыі пасьля складаньня пратаколу

Актывіста хрысьціянска-дэмакратычнага руху Андрэя Гайдукова адпусьцілі зь міліцыі пасьля складаньня адміністрацыйнага пратаколу, паведамляе прэс-служба аргкамітэту па стварэньні партыі "Беларуская хрысьціянская дэмакратыя".

Былому палітзьняволенаму інкрымінуюць арганізацыю і правядзеньне несанкцыянаванага масавага мерапрыемства (ч. 1 арт. 23.34 Кодэксу аб адміністрацыйных правапарушэньнях).

Як паведамлялася раней, Гайдукоў быў затрыманы 21 лістапада пасьля раздачы ўлётак зь інфармацыяй аб беларускіх палітзьняволеных. Амаль увесь час за Гайдуковым сачылі людзі ў цывільным, якія рабілі здымкі на відэа. Актывіст быў затрыманы па дарозе дадому.

Гайдукоў правёў у зьняволеньні паўтара года — зь лістапада 2012 г. па травень 2014-га. Беларускія праваабаронцы выступілі з сумеснай заявай, у якой прызналі Андрэя Гайдукова палітвязьнем.

БелаПАН/эб