Па справе „Ўралкалія” Беларусь падасьць пазоў на 100 млн даляраў

Сума беларускіх грамадзянскіх пазоваў па так званай „калійнай справе” складзе каля 100 млн даляраў. Пра гэта журналістам паведаміў генэральны пракурор Аляксандр Канюк.

Разам з тым, генпракурор прызнаўся, што час разгляду справы ў судзе пакуль невядомы, бо ў Расеі „калійная справа” ўсё яшчэ працягвае разглядацца.

Свае фінансавыя прэтэнзіі Беларусь плянуе заявіць на судзе над былым гендырэктарам расейскай кампаніі „Ўралкалій” Уладзіславам Баўмгертнэрам. У тым выпадку, калі гэты суд усё ж такі адбудзецца.

Гендырэктара „Ўралкалія” затрымалі ў Менску 26 жніўня 2013 году. Спярша яго вінавацілі ў злоўжываньні ўладай і службовымі паўнамоцтвамі, потым абвінавачаньне было дапоўнена крадзяжом. У лістападзе таго ж году Баўмгертнэра перадалі расейскім праваахоўнікам. Пасьля гэтага беларускі бок перадаў у Расею ўсе дакумэнты па справе.

БелаПАН/euroradio.fm/аз