Беларускі ўрад баіцца праблем з выплатай крэдытаў

Беларускі ўрад асьцерагаецца праблем з выплатай зьнешніх пазыкаў. Такія праблемы могуць узнікнуць у выніку падатковых зьменаў у нафтавай галіне, якія плянуе Расея.

Беларусь дамаглася права ў 2015 годзе пакінуць у сваім бюджэце 1,5 мільёна даляраў вывазнога экспартнага мыта на нафтапрадукты з расейскай нафты. Гэтыя сродкі плянавалася накіраваць на выплату зьнешняй дзяржаўнай запазычанасьці.

У выніку заплянаваных Расеяй падатковых зьменаў, паводле ацэнкі кіраўніка Беларусі Аляксандра Лукашэнкі, страты краіны могуць перавысіць 1 мільярд даляраў.

Раней паведамлялася, што на выплату й абслугоўваньне зьнешняй дзяржаўнай пазыкі ў 2015 годзе плянуецца прызначыць 4 мільярды даляраў.

Урад Расеі распрацаваў законапраект, які прадугледжвае паступовае зьніжэньне экспартнага мыта на нафту з перакладваньнем фіскальнай нагрузкі на здабычу.

Для кампэнсацыі стратаў беларускі бок хоча цалкам пакідаць у сваім бюджэце экспартнае мыта на нафтапрадукты з расейскай сыравіны да 2017 году.

РИА Новости/euroradio.fm/аз