300 чалавек падтрымалі палітвязьняў на сайце "Міжнароднай амністыі"

Мэдыйную кампанію "Віртуальны хакейны стадыён" праваабарончая арганізацыя
"Міжнародная амністыя" запусьціла напярэдадні адкрыцьця ў Менску чэмпіянату сьвету па хакеі. Яе мэта — заклікаць улады Беларусі да неадкладнага і безумоўнага вызваленьня вязьняў сумленьня Алеся Бяляцкага, Мікалая Статкевіча і Эдуарда Лобава, а таксама прыцягнуць увагу грамадзкасьці да рэпрэсіўнага беларускага заканадаўства.

Інтэрактыўны "Віртуальны хакейны стадыён", зайсьці на які можна з сайту "Міжнароднай амністыі" (www.amnesty.org), прапануе тым, хто жадае паглядзець матч па правах чалавека ў Беларусі, заняць сабе месцы побач зь Бяляцкім, Статкевічам і Лобавым, праявіўшы такім чынам салідарнасьць зь імі. Сабраныя подпісы плянуецца адправіць Аляксандру Лукашэнку.

Падчас кампаніі "Міжнародная амністыя" таксама распаўсюджвае інфармацыю аб фактах парушэньня правоў чалавека ўладамі Беларусі, у тым ліку пра нядаўнія прэвэнтыўныя затрыманьні ў Менску, а таксама пра рэпрэсіўнае заканадаўства ў сфэры грамадзянскіх правоў.

Нагадаем, паводле зьвестак беларускіх праваабаронцаў, у выніку шэрагу прэвэнтыўных затрыманьняў напярэдадні чэмпіянату сьвету па хакеі ў Менску розныя тэрміны адміністрацыйнага арышту адбываюць 28 палітычных і грамадзкіх актывістаў. Найбольш распаўсюджаныя абвінавачваньні — дробнае хуліганства і непадпарадкаваньне супрацоўнікам міліцыі.

БелаПАН/эб