У Беларусі могуць забараніць продаж піва ў ПЭТ-бутэльках

У Беларусі могуць забараніць продаж піва ў ПЭТ-бутэльках ад 1,5 л і больш. Такую прапанову агучыў старшыня Камітэту дзяржкантролю Аляксандр Якабсон.

10 красавіка ў кіраўніка Беларусі адбылася нарада па стане й пэрспэктывах разьвіцьця піваварнай галіны.

Аляксандр Якабсон агучыў некалькі прапаноў наконт паляпшэньня сытуацыі ў піваварнай галіне. У прыватнасьці, ён лічыць неабходным зацьвердзіць гранічныя мінімальныя розьнічныя цэны на піва па аналёгіі з гарэлкай, каб не дапусьціць дэмпінгу коштаў з боку міжнародных карпарацый.

Акрамя таго, ён лічыць вартым усталяваць дыфэрэнцыяваныя стаўкі акцызу на піва. Найбольшыя прэфэрэнцыі павінны давацца піву зь меншым утрыманьнем абсалютнага алкаголю.

Таксама старшыня КДК прапанаваў, каб у кожным гандлёвым аб'екце (асабліва ў грамадзкім харчаваньні) ў продажы пастаянна было піва ўсіх беларускіх вытворцаў.

Сярод прапановаў Якабсона была й забарона прадаваць на тэрыторыі Беларусі піва, разьлітае ў ПЭТ-бутэлькі ёмістасьцю ад 1,5 л і вышэй.

euroradio.fm/аз