На беларускім рынку працы недахоп рук

Такая выснова зробленая на падставе дасьледаваньняў, прысьвечаных сытуацыі на рынку працы Беларусі, праведзеных экспэртамі Дасьледчага цэнтру ІПМ, Беларускага эканамічнага досьледна-адукацыйнага цэнтру і Нямецкай эканамічнай групы ў Беларусі, інфармуе партал naviny.by.

Аўтары дасьледаваньня, грунтуючыся на зьвестах афіцыйнай статыстыкі, адзначаюць, што за 2013-2020 гады насельніцтва ў працаздольным узросьце ў Беларусі можа скараціцца больш чым на 0,5 млн. чалавек. Адпаведна яго доля ў структуры насельніцтва ўпадзе з 60,1 да 55,6%. Прагнозы ААН, гаворыцца ў аналізе, таксама сьведчаць аб будучым скарачэньні колькасьці працаздольнага насельніцтва ў Беларусі.
Паводле ацэнак адмыслоўцаў, удзел Беларусі ў Адзінай эканамічнай прасторы можа каталізаваць працэс адтоку кадраў з краіны.

Каб пазбегнуць адмоўных наступстваў працоўнай міграцыі, неабходна выпрацаваць новыя падыходы да вырашэньня згаданай праблемы. Аўтары дасьледаваньня падкрэсьліваюць: рост заробнай платы павінен суправаджацца адэкватным павышэньнем прадукцыйнасьці працы, што стане магчымым у выпадку павышэньня эфектыўнасьці выкарыстаньня наяўных працоўных рэсурсаў.

naviny.by/эб