«Беларусь – у Эўропу!» - заклікаў былы прэм'ер Польшчы.

Фота: PAP

У трынаццаты раз па вуліцах Варшавы прайшло шэсьце, прымеркаванае да сьвята Эўропы. Яно называецца Парад Шумана ў гонар аднаго з заснавальнікаў эўрапейскай інтэграцыі, францускага міністра замежных справаў Рабэра Шумана.

Праз цэнтар Варшавы ў рознакаляровых касьцюмах, са сьцягамі й музычнымі інструмэнтамі прайшлі сотні студэнтаў і школьнікаў з розных гарадоў Польшчы, а таксама моладзь з Украіны й Даніі. З плятформаў, якія цягнулі грузавікі, гралі ды-джэі, па вуліцах таксама маршыраваў духавы аркестар.

На жаль, сёлетні парад моцна папсавала надво’е. Зраніцы ў Варшаве ліў дождж. Перад удзельнікамі Параду Шумана выступілі эўракамісар Януш Левандоўскі ды першы прэм’ер дэмакратычнай польшчы Тадэвуш Мазавецкі.

Пад аплядысмэнты публікі ён вітаў тых, хто змагаецца за дэмакратыю ў Беларусі ды Ўкраіне. “Украіну й Беларусь – у Эўропу! Гэтыя краіны павінны выбраць эўрапейскі шлях”, - заклікаў Тадэвуш Мазавецкі.

PAP/ап