Захад і Арабская ліга прымушаюць Асада й апазыцыю спыніць агонь

Фота: ndiatvnews.com

Сырыйскія ўлады ня выведуць войскаў з вуліц гарадоў, пакуль там не запануе спакой. Так адказаў прэс-сакратар міністэрства замежных справаў Сырыі на заклік спэцыяльнага эмісара ААН Кофі Анана неадкладна спыніць агонь.

Нягледзячы на тое, што Башар Асад пагадзіўся з плянам мірнага ўрэгуляваньня, які запрапанаваў Кофі Анан, у краіне па-ранейшаму ідуць баі. Учора ў Сырыі загінула больш за 30 чалавек.

Тым ня менш, экспэрты лічуць, што плян Анана можа спыніць канфлікт. Плян зацьвердзілі ня толькі заходнія краіны, але й Расея ды Кітай.

Першымі пунктамі пляну зьяўляецца неадкладнае спыненьне агню ўрадам і апазыцыяй, эвакуацыя параненых ды вывад бронетэхнікі з вуліцаў. Затым павінныя пачацца перамовы па палітычным вырашэньні канфлікту. Заўтра ў Стамбуле адбудзецца стустрэча так званай групы сяброў Сырыі. Чакаецца, што заходнія краіны й арабскія дзяржавы будуць дамагацца ад сырыйскай апазыцыі аб’яднацца й прыняць умовы мірнага пляну Кофі Анана.

За год грамадзянскай вайны ў Сырыі загінула больш за 9 тысячаў чалавек.

IAR/ап