Майка - не, чэмпіянат - так

У славутай канадзкай Залі хакейнай славы зь ліку экспанатаў прыбралі хакейную майку Аляксандра Лукашэнкі.

Кіраўніцтва музэю, што месьціцца ў канадзкім горадзе Таронта, неадкладна адрэгавала на зварот беларускіх і замежных грамадзкіх дзеячоў.

Яшчэ ў лістападзе група вядомых асобаў, сярод якіх былі першы прэзыдэнт Чэхіі Вацлаў Гавэл, знакаміты драматург Том Стопард, летувіскі баскэтбаліст Шарунас Марчулёніс і прадстаўнікі беларускіх апазыцыйных арганізацый, накіравалі заяву ў музэй з патрабаваньнем “пазбавіцца ад Лукашэнкі”.

“Мы заклікаем усіх людзей добрай волі далучыцца да нашай ініцыятывы й спыніць палітычныя маніпуляцыі спортам, у прыватнасьці, хакеем, на тэме якога спэкулюе Лукашэнка — чалавек, які ўзурпаваў уладу, фальсыфікуючы вынікі выбараў, і гвалтам зьнішчыў сваіх палітычных праціўнікаў”, - пісалі аўтары звароту. Паводле падпісантаў, Лукашэнка дыскрэдытуе спорт.

Майка гульца №1 вісела на сьценцы найславуцейшай Залі хакею ў сьвеце болей як дзесяць год. Сымбалічна, што музэй прыбраў гэты экспанат напярэдадні заплянаванага ў Беларусі Чэмпіянату сьвету па хакеі, супраць правядзеньня якога цяпер выступаюць многія.

Арцём Багданаў, Менск/аз