Як улада хлусіла народу пасьля Чарнобыля

Нядаўна былі апублікаваныя архіўныя матэрыялы КДБ па Кіеўскай вобласьці. Агулам больш за тысячу старонак. Сярод іх знаходзяцца сакрэтныя рапарты ды інфармацыя аб настроях сярод ўкраінскага грамадзтва ў першыя тыдні пасьля выбуху Чарнобыльскай АЭС, – паведамляе тыднёвік «Sieci».

З іх вынікае, што людзі ня верылі афіцыйным паведамленьням, маўляў дзяржава трымае ўсё пад кантролем. Дзе-нідзе выбухала паніка і нават бунты.

Як вынікае з рассакрэчаных дакумэнтаў, афіцыйныя паказчыкі радыеактыўнага забруджаньня былі моцна заніжаныя. Адна жыхарка Кіева, выказваньне якой працытавалі ў рапарце супрацоўнікі КДБ, іранічна адзначыла, што хаця ўлады запэўніваюць у тым, што забруджаньне ніжэй нормы, то ніхто не сказаў, якіж сапраўдны ўзровень той нормы.

Кожны дзень у кіеўскія шпіталі прыходзілі дзясяткі пацыентаў з сымптомамі радыяцыйнай хваробы. Некаторым ставілі фальшывыя дыягназы з той мэтай, каб не было ўцечкі сапраўднай інфармацыі.

Афіцыйна, усе тавары харчаваньня з забруджанай тэрыторыі мусілі праходзіць праверку дазіметрамі. А на сам рэч, як пазначана ў рапартах КДБ, узамен за хабары, на рынак паступала не правераная ежа. Улады таксама праводзілі масавы забой сьвіней і быдла, а мяса прадавалася ў звычайных крамах.

Людзі шукалі сапраўдную інфармацыю, слухалі замежныя радыёстанцыі. Агенты паведамлялі пра масавыя выплаты грошай з банку. Многія жыхары Савецкай Украіны імкнуліся зьбегчы, некаторыя спасылаліся на свае габрэйскія карані й прасілі дазвол на выезд у Ізраіль.

З Кіева ў Ленінград зьбіраліся зьбягаць замежныя студэнты. Аднак іх затрымалі на месцы пераконваючы, што радыеактыўнае воблака затрымалася ў небе над Ленінградам. Агенты КДБ былі вымушаны пільна сачыць за замежнымі карэспандэнтамі. У архівах знойдзены дакумэнт, у якім пацьвярджаецца, што супрацоўнікі службы бясьпекі падмянялі францускаму карэспандэнту пробы зямлі з ваколіц Чарнобыля.

Пра рассакрэчаныя архівы КДБ, датаваныя першымі тыднямі пасьля выбуху Чарнобыльскай АЭС, пісаў тыднёвік «Сеці».

яс