У Беларусі адзначылі юбілей Чэслава Немэна

Беларускія палякі ды мясцовыя ўлады адзначылі 80-годзьдзе з дня нараджэньня Чэслава Немэна.

У горадзе Шчучын на захадзе Беларусі адбыўся канцэрт, прэзэнтацыя кнігі і адкрыцьцё выставы фотаздымкаў і карцін, прысьвечаных польскаму сьпеваку.

Чэслаў Немэн нарадзіўся ў вёсцы Старыя Васілішкі непадалёк ад Шчучына. 83-гадовая Ганна Макарэвіч, жыхарка вёскі, хадзіла разам зь ім у школу і да касьцёла, у якім прайшла памятная служба.

У інтэрвію Польскаму радыё яна распавяла, што Чэслаў Немэн выдзяляўся ў школе – меў прыгожы голас і быў лідэрам.

У сямейным доме музыкі месьціцца цяпер музэй Чэслава Немэна. Установу наведаў амбасадар Польшчы ў Беларусі Артур Міхальскі. «Я належу да пакаленьня, якое вырасла на музыцы Чэслава Немана. Мяне сюды вельмі цягне. Гэтая малая радзіма Немэна вельмі мілая. Трэба падзякаваць мясцовым уладам і грамадзкасьці за тое, што яны клапоцяцца пра памяць Чэслава Немэна», – зазначыў пасол.

ПР/уп