Дэпутаты эўрапарлямэнту супраць Nord Stream 2

Некалькі дзясяткаў эўрадэпутатаў з розных палітычных партый і амбасадары нацыянальных парлямэнтаў зьвярнуліся з заклікам да канцлеркі Нямеччыны Ангелы Мэркель спыніць будаўніцтва Nord Stream 2. Паводле падпісантаў ліста, праект трубаправода не знаходзіцца ў інтарэсе Эўразьвязу.

Эўрадэпутаты пішуць адкрыта, што пазыцыя Нямеччыны па Nord Stream 2 супярэчыць мэтам энэргетычнага саюза супольнасьці. Яны даказваюць, што Nord Stream 2 дасьць Крамлю „дадатковы стратэгічны” ўплыў на Эўразьвяз, паколькі павялічыць ягоную энэргетычную залежнасьць ад Расеі.

Паводле іх, падтрымліваючы ідэю Nord Stream 2, Нямеччына дзеліць ЭЗ і дзейнічае насуперак волі Эўрапейскай камісіі, Эўрапарлямэнту й большасьці Эўрапейскай рады.

Падпісанты ліста заклікаюць канцлерку Ангелу Мэркель да зьмены палітыкі ў дачыненьні да Nord Stream 2.

аз