Польшча ідзе ў паломніцтва

Пад хэштагам #PolskaPielgrzymuje (Польшча ў паломніцтва) пачалася акцыя ў сацыяльных сетках у гэтай краіне.

Польскія сьвятары заахвочваюць людзей дзяліцца сваімі ўражаньнямі з паломніцтва. Касьцёл разьлічвае, што акцыя яднае мільёны палякаў, як летась.

Ксёндз Павэл Рытэль-Андранік з прэсавай службы Канфэрэнцыі польскага эпіскапату распавёў, што паломніцтва ўпісана ў гены палякаў. Штогод блізу 7 мільёнаў палякаў ходзяць у паломніцтва ў сьвятыя мясьціны. Адна траціна палякаў (32%) дэкляруюць, што па меншай меры адзін раз цягам свайго жыцьця ўдзельнічалі ў пілігрымцы.

Акцыя #PolskaPielgrzymuje скіравана таксама да людзей, якія па розных прычынах не змаглі пайсьці ў пілігрымку. Дзякуючы акцыі яны могуць духоўна яднацца з паломнікамі. Апісаньні пілігрымак, фотаздымкі ды відэазапісы разьмешчаныя ў Сеціве даюць ім магчымасьць адчуваць радасную атмасфэру паломніцтва і далучыцца да малітваў.

Акцыя #PolskaPielgrzymuje вядзецца ў сацыяльных мэдыях, як Twitter, Facebook і Instagram.

ПР/юл