У Менску дзіця захварэла на адзёр

У Менску дзіця захварэла на адзёр. Гэты выпадак лябараторна пацьверджаны, паведамляе агенцтва БелТА са спасылкай на прэс-службу Міністэрства аховы здароўя. Дзіця не было прышчэпленае, паколькі бацькі ад вакцынацыі адмовіліся. Мяркуецца, што заражэньне адбылося падчас турыстычнай паездкі ў Эгіпет і Ўкраіну.

Цяпер спэцыялісты праводзяць поўны комплекс санітарна-супрацьэпідэміялягічных мерапрыемстваў, каб не дапусьціць пашырэньня захворваньня.

Першыя выпадкі захворваньня на адзёр былі зафіксаваныя ў лютым сёлета ў Ваўкавыску. Пазьней – у Гомельскай і Берасьцейскай абласьцях. Нядаўна паведамлялася пра траіх чалавек, шпіталізаваных у Маларыцкім раёне. Яны маглі захварэць з-за кантакту з украінцам, які прыехаў у Беларусь.

Некалькі тыдняў таму Мінаховы здароўя паведамляла пра 40 выпадкаў захворваньняў на адзёр.

эўрарадыё/вс