Шыдла й Макрон абмеркавалі шэраг важных пытаньняў

Прэм’ер-міністар Польшчы Бэата Шыдла знаходзіцца зь візытам у Францыі. Кіраўнік Кабміну сказала, што яе сустрэча з прэзыдэнтам Францыі Эманюэлем Макронам была «добрай і патрэбнай», і што падчас перамоў удалося высьветліць пэўныя спрэчныя пытаньні. Размова палітыкаў доўжылася больш за гадзіну.

Падчас сустрэчы быў закрануты шэраг пытаньняў двухбаковых адносін, у тым ліку эканамічных, функцыянаваньня Эўрапейскага Зьвязу і ўнутраных спраў Польшчы.

Эманюэль Макрон выказаў заклапочанасьць у сувязі з плянаванай у Польшчы рэформай судовай сыстэмы й галасамі пра тое, што яна можа несьці пагрозу дэмакратыі ў краіне.

Шыдла супакоіла суразмоўцу, зазначыўшы, што Польшчы прытрымліваецца эўрапейскіх прынцыпаў справядлівасьці, каштоўнасьцей і вяршэнства законаў.

«Наша гісторыя навучыла нас, што свабода, сувэрэнітэт, салідарнасьць, дэмакратыя – гэта каштоўнасьці, якія мы павінны абараняць перш за ўсё», – сказала прэм'ер Польшчы.

У сваю чаргу прэзыдэнт Макрон сказаў, што Францыя ня хоча ўмешвацца ў рэформу судовай сыстэмы ў Польшчы, і заклікаў Варшаву да канструктыўнага дыялёгу з Эўразьвязам па гэтаму пытаньню.

Бэата Шыдла выказала задавальненьне фактам, што прэзыдэнт Эманюэль Макрон прыняў запрашэньне ў Варшаву на адзначэньне 100-годзьдзя незалежнасьці Польшчы 11 лістапада 2018 году.

вс