«Мадура дыктатар і павінен сысьці»

Прэзыдэнт Пэру Пэдра Кучыньскі (Pedro Kuczynski) у пятніцу зьвярнуўся да кіраўніка Вэнэсуэлы Нікаляса Мадуры (Nicolas Maduro) з заклікам сысьці з пасады. Кучыньскі назваў Мадуру «дыктатарам» і адхіліў прапанову сустрэчы. Урад Пэру прыняў рашэньне выдаліць вэнэсуэльскага амбасадара.

Кучыньскі заявіў, што Мадура «страціў усялякі давер», стварыўшы, насуперак прынцыпам дэмакратыі, Канстытуцыйную асамблею. Гэтай асамблеі, складзенай з уласных прыхільнікаў, Мадура перадаў паўнамоцтвы найвышэйшага воргану ўлады.

«Мадура зьяўляецца дыктатарам, які арганізаваў дзяржаўны пераварот, сфальсыфікаваўшы выбары, каб пазбавіцца ад ранейшага парлямэнту», – заявіў прэзыдэнт Пэру.

30 ліпеня ўлады Вэнэсуэлы правялі выбары ў Канстытуцыйную асамблею – ворган, якому нададзенае права распусьціць парлямэнт і зьмяніць канстытуцыю. Апазыцыя байкатавала выбары. На працягу некалькіх месяцаў на вуліцах вэнэсуэльскіх гарадоў працягваюцца сутыкненьні маніфэстантаў з паліцыяй. У выніку пратэстаў загінулі ўжо больш за 100 чалавек.

PAP/ап