Ва Ўкраіне за гергіеўскую стужку аштрафуюць альбо пасадзяць на суткі

Вярхоўная рада Ўкраіны прыняла закон, які ўводзіць адміністрацыйную адказнасьць за георгіеўскія стужкі.
На заканадаўчым узроўні ва Ўкраіне георгіеўскія стужкі не забароненыя, аднак улады настойліва рэкамэндуюць адмовіцца ад іх і папулярызуюць новы сымбаль Дня Перамогі – стылізаваную кветку чырвонага маку, які традыцыйна выкарыстоўваецца ў Эўропе 8 траўня.

У тлумачальнай запісцы да законапраекта сьцьвярджаецца, што з 2014 года георгіеўская стужка выкарыстоўвалася «прарасейска настаўленымі сэпаратыстамі на тэрыторыі Ўкраіны й стала сымбалем сэпаратызму», паведамляе агенцтва РИА Новости.

У законе выкарыстаньне георгіеўскай стужкі, нашэньне на вопратцы, выява на плякатах або паштоўках, у творах мастацтва й СМІ або мацаваньне на аўтамабілях вызначаецца як «прапаганда».

Такія парушэньні будуць карацца штрафам (у пераліку з грыўняў) ад 32 да 97 даляраў па бягучым курсе. Сама стужка й прадметы, на якіх яна намаляваная, падлягаюць канфіскацыі.

Паўторнае парушэньне пагражае штрафам ад 97 да 190 даляраў або адміністрацыйным арыштам на тэрмін да 15 сутак.

У законе зроблена выключэньне для ордэнаў і мэдалёў Вялікай Айчыннай вайны, у афармленьні якіх выкарыстаная георгіеўская стужка.

вс