Банк разьвіцьця выдзяляе дадатковыя сродкі на будаўніцтва МКАД-2

Банк разьвіцьця распачаў выдзяленьне Міністэрству транспарту й камунікацый дадатковага аб'ёму фінансаваньня для будаўніцтва другога этапу другой кальцавой аўтамабільнай дарогі вакол Менска. Выдзяленьне крэдыту ажыцьцяўляецца за кошт сродкаў сямейнага капіталу, удакладняе прэс-служба Банка разьвіцьця.

Будаўніцтва аўтамабільнай дарогі вызначана ўказам Аляксандра Лукашэнкі ад 13 кастрычніка 2010 году № 532 і вядзецца ў два этапы. Першы этап працягласьцю 46,4 км уведзены ў эксплёатацыю ў сьнежні 2015 году. Другі этап працягласьцю 41,4 км заплянаваны да ўводу да 1 студзеня 2017 году.

З удзелам Банка разьвіцьця ажыцьцяўлялася будаўніцтва першага этапу другой МКАД, а са сьнежня 2015 году банк распачаў фінансаваньне будаўніцтва другога этапу. Агульная сума крэдытнай падтрымкі склала 272,5 млн беларускіх рублёў у эквіваленце.

Патрэба ў 2016 годзе ў крыніцах фінансаваньня для своечасовага завяршэньня работ па будаўніцтве другога этапу склала 213,9 млн рублёў.

Як тлумачаць у банку, для забесьпячэньня бесперабойнага фінансаваньня затрат па праекце прынята распараджэньне прэзыдэнта, якое прадугледжвае выдзяленьне Банкам разьвіцьця крэдыту ў замежнай валюце ў суме, якая не перавышае 125 млн рублёў у эквіваленце.

Пры гэтым банк супакойвае, што фінансаваньне ўсіх астатніх інвэстыцыяў будзе забясьпечана ў поўным аб'ёме.

belapan.com/аз