Польшча супраць рэформы палітыкі ЭЗ па прадастаўленьні прытулку

„Польшча выступае супраць прапанаваных Эўракамісіяй зьменаў палітыкі ЭЗ па прадастаўленьні палітычнага прытулку, паколькі яны ўтрымліваюць пастаянную сыстэму разьмеркаваньня бежанцаў паміж краінамі ЭЗ”, - заявіў кіраўнік польскага Міністэрства ўнутраных спраў і адміністрацыі.

„Польская пазыцыя пасьлядоўная й ясная. Мы лічым, што пастаянная сыстэма разьмеркаваньня ўцекачоў – гэта дрэнны мэханізм, які прыцягвае хвалю бежанцаў і не вырашае праблемы, зь якой змагаецца Эўропа”, - сказаў Марыюш Блашчак (поль. Mariusz Błaszczak) падчас сустрэчы міністраў унутраных спраў краінаў ЭЗ у Люксэмбургу. Рэформа палітыкі прытулку ЭЗ была адной з тэм сустрэчы міністраў.

6 красавіка Эўракамісія прапанавала два варыянты рэформы цяперашняй палітыкі ЭЗ па прадастаўленьні палітычнага прытулку ў Эўразьвязе. Паводле дзейных Дублінскіх палажэньняў, разгледзець заяву на прадастаўленьне палітычнага прытулку павінна дзяржава, у якой бежанец перасёк мяжу ЭЗ.

Мэтай рэформы, прапанаванай Эўракамісіяй, зьяўляецца больш справядлівае разьмеркаваньне паміж краінамі ЭЗ цяжару, зьвязанага з прытокам бежанцаў, які цяпер назіраецца ў Эўропе.

„Я ўпэўнены, што наша пазыцыя - вельмі рэалістычная й прагматычная, знойдзе падтрымку ў нашых партнэраў”, - дадаў міністар Блашчак.

аз