Чэкавая лятарэя б’е рэкорды папулярнасьці

5 мільёнаў 592 тысячы 300 чэкаў зарэгістравалі польскія пакупнікі на сайце чэкавай лятарэі, арганізатарам якой зьяўляецца Міністэрства фінансаў Польшчы. Кожны зарэгістраваны чэк прымае ўдзел у штомесячным розыгрышы аўтамабіля сямейнага кляса ды бытавой тэхнікі. Штоквартал дадаткова разыграецца аўто мэнаджарскага кляса.

Міністар фінансаў Матэвуш Шчурэк тлумачыць, што асноўная мэта чэкавай лятарэі - адукацыя падаткалатнікаў і прасоўваньне добрасумленнай канкурэнцыі. Мінфін спадзяецца таксама, што дзякуючы лятарэі павялічацца паступленьні ад падатку на дададзеную вартасьць (ПДВ).

Лятарэя стартавала 1 кастрычніка. Акцыя будзе працягвацца да канца верасьня 2016 году.

На лятарэю ведамства выдаткуе 7 млн злотых (1 млн 650 тыс. эўра).Чыноўнікі спадзяюцца, што гэтыя грошы аднак вернуцца ў бюджэт, бо пакупнікі будуць патрабаваць у прадаўцоў чэкаў, і ў сувязі з гэтым зьменшыцца ўкрыцьцё даходу і ў выніку павялічацца паступленьні ад ПДВ.

Паводле дадзеных Мінфіна Польшчы, толькі 7% палякаў патрабуюць у прадаўцоў выдаць чэк у выпадку, калі яго не атрымаюць.

аз