Вільня вінаваціць Тамашэўскага ў варожай дзейнасьці

Летувіскія ўлады абвінавачваюць лідара „Выбарчай акцыі палякаў Летувы” у антыдзяржаўных дзеяньнях. Паводле тамтэйшых СМІ, Вальдэмар Тамашэўскі працягвае кантакты з пракрамлёўскімі актывістамі й прадстаўнікамі расейскіх сродкаў масавай інфармацыі, а таксама падтрымлівае іх фінансамі зь бюджэту партыі.

Абурэньне выклікала паведамленьне аб сустрэчы эўрадэпутата й лідара „Выбарчай акцыі палякаў Летувы” з кіраўніком расейскага Першага тэлеканала напярэдадні акцыі пратэсту, арганізаванай польскай партыяй.

Кіраўнік летувіскай дыпляматыі Лінас Лінкявічус абвінаваціў лідараў партыі й асабіста Тамашэўскага ў тым, што яны шкодзяць Летуве. Міністар замежных спраў Летувы лічыць таксама, што згаданыя асобы не зацікаўленыя ў вырашэньні праблемаў польскай меншасьці, а толькі ў падбухторваньні супраць урада, што, дарэчы, на руку Расеі.

Летувіскія ўлады даўно вінавацяць Вальдэмара Тамашэўскага ў занадта цесных кантактах з пракрамлёўскімі сіламі ў Летуве.

Нагадаем, Вальдэмар Тамашэўскі ачольвае „Выбарчую акцыю палякаў Летувы” з 1999 году. Частцы тамтэйшых палякаў не падабаецца яго „аўтарытарны стыль” кіраваньня партыяй.

аз