Свабода прэсы ў Эўропе пад пагрозай

Перад свабодай прэсы ў Эўразьвязе стаяць новыя выклікі, а інстытуты ЭЗ няёмка яе абараняюць. Так у апошнім дакладзе сьцьвярджаюць экспэрты Камітэта па абароне журналістаў. Арганізацыя адзначае, што, хоць эўрапейская супольнасьць лічыцца ўзорам у пляне свабоды прэсы, то існуе шмат пагрозаў, якія падрываюць гэтую пазыцыю.

Паводле справаздачы, праблемай зьяўляюцца, між іншым, правілы, якія дазваляюць пакараць журналіста за паклёп ці блюзьнерства, гвалт у дачыненьні да журналістаў, што здараяцца, напрыклад, у Балгарыі й Італіі ці масавае сакрэтнае назіраньне за прадстаўнікамі прэсы.

„Меры па барацьбе з тэрарызмам абмяжоўваюць магчымасьці працы журналістаў”, - кажа аўтар дакладу Жан-Пол Марту.

Дакумэнт крытыкуе за парушэньне свабоды прэсы, між іншым, Вугоршчыну. Паводле Камітэта па абароне журналістаў, грамадзкія СМІ у гэтай краіне прадстаўляюць на самой справе пункт гледжаньня ўрада Віктара Орбана.

Паводле аўтараў справаздачы, давер у дачыненьні да эўрапейскай супольнасьці й ейнае значэньне на міжнароднай арэне ў значнай ступені будзе залежаць ад яе здольнасьці абараняць фундамэнтальныя каштоўнасьці, такія як свабода прэсы.

аз