Абама паціснуў руку Кастра

Барак Абама й Рауль Кастра паціснулі адзін аднаму рукі падчас Саміту Амэрык, які праходзіць у Панаме. Паводле назіральнікаў, гэты жэст сымбалізуе імкненьне Злучаных Штатаў Амэрыкі й Кубы да нармалізацыі адносінаў.

Абама й Кастра ўдзельнічаюць у паседжаньні лідараў Паўночнай і Паўднёвай Амэрык. Кубінскі лідар прысутнічае на гэтым саміце ўпершыню.

Абодва палітыкі сустрэцца сёньня яшчэ раз у кулюарах саміту. Пасьля прыбыцьця ў Панаму, Абама й Кастра размаўлялі таксама па тэлефоне. Пра што – пакуль невядома.

Раней, падчас форуму грамадзянскай супольнасьці, які суправаджае Саміт Амэрык у Панаме, амэрыканскі прэзыдэнт сустрэўся з актывістамі кубінскай апазыцыі. Ён падкрэсьліў, што Злучаныя Штаты Амэрыкі нязьменна выступаюць у абарону правоў чалавека ў Лацінскай Амэрыцы.

Нагадаем, у сьнежні ЗША й Куба абвясьцілі аб намеры нармалізацыі дыпляматычных адносінаў. Учора адбылася гістарычная сустрэча кіраўнікоў дыпляматыі абедзьвюх краінаў.

Сустрэча Барака Абамы й Рауля Кастра ў Панаме будзе першай гэткай падзеяй цягам апошняга паўстагодзьдзя, то бок з моманту калі Куба й ЗША парвалі дыпляматычныя адносіны.

аз