Расея абвясьціла аб закрыцьці праекту „Паўднёвы паток”

Расея ня можа ў цяперашніх умовах працягваць рэалізацыю праекта „Паўднёвы паток”. Пра гэта заявіў прэзыдэнт краіны Ўладзімір Пуцін на прэс-канфэрэнцыі ў Анкары пасьля перамоваў з прэзыдэнтам Турцыі Рэджэпам Таіпам Эрдаганам. Наўзамен будзе пабудаваны новы газаправод праз Чорнае мора ў напрамку Турцыі.

Пуцін адзначыў, што Балгарыя дагэтуль не дала дазволу на будаўніцтва, таму Расея ў гэтых умовах ня можа працягваць рэалізацыю праекта. „Усё, праект зачынены”, - паведаміў кіраўнік „Газпрoма” Аляксей Мілер.

Пры гэтым Масква мае намер пашырыць супрацоўніцтва ў нафтагазавай сфэры з Турцыяй. Яна хоча пабудаваць трубу такой жа магутнасьці, як „Паўднёвы паток”, праз Чорнае мора ў Турцыю.

Раней новы ўрад Балгарыі прыняў рашэньне прыпыніць рэалізацыю праекта на сваёй тэрыторыі. Італія таксама заявіла, што „Паўднёвы паток” больш не зьяўляецца для яе прыярытэтам. Пуцін адзначыў, што з-за свайго выбару Балгарыя недаатрымае сотні мільёнаў эўра ў год.

euroradio.fm/аз