"Мова ці кава"?

У Менску 13 студзеня пачаўся трэці сэзон курсаў беларускай мовы "Мова ці кава". Заняткі праходзяць у кожны панядзелак у памяшканьні крэатыўнай прасторы "Цэх".

Як зазначыла ў інтэрвію БелаПАН арганізатар курсаў Кацярына Кібальчыч, плянуецца, што яны будуць доўжыцца да канца года. "Калі мы пачыналі ўсё ў студзені 2013 года, то плянавалі, што будзем працаваць да лета, — сказала яна. — Курсы аказаліся папулярнымі, таму восеньню мы пачалі другі сэзон. Цяпер я разумею, што яны будуць доўжыцца яшчэ год, а потым час пакажа".

Кібальчыч падкрэсьліла, што ідэя заключаецца ня ў тым, каб гэты праект "жыў вечна", а ў тым, каб на яго прыкладзе зьяўляліся іншыя падобныя курсы.

Паводле словаў арганізатаркі, ужо цяпер у Менску апрача курсаў "Мова цi кава" ёсьць курсы беларускай мовы "Арт Сядзібы" і курсы "Мова нанова", якія таксама стартавалі 13 студзеня ў галерэі "Ў". Апрача таго, паводле інфармацыі Кібальчыч, плянуецца адкрыць яшчэ двое курсаў беларускай мовы.

Тэмаю першых заняткаў стала грамадзкае харчаваньне. Абмяркоўвалася беларуская лексіка для размовы ў кафэ, разгарнулася дыскусія пра тое, ці трэба размаўляць на беларускай мове з афіцыянтам або бармэнам, ці павінны яны адказваць кліенту па-беларуску і чаму ў рэстаранах звычайна няма мэню на беларускай мове.

Рэгістрацыя для слухачоў курсаў не патрэбная, аднак у супольнасьці "Мова ці кава" ў сацыяльнай сетцы "Фэйсбук" арганізатары прасілі ахвотных наведваць курсы даслаць ім кароткае паведамленьне па электроннай пошце з указаньнем сваіх інтарэсаў і прычын, што прымусілі пачаць вывучэньне беларускай мовы. "За год нам напісалі больш за 600 чалавек", — паведаміла Кібальчыч, зазначыўшы, што рэальна курсы наведала значна больш людзей.

БелаПАН/эб